بعد الفرح المعازيم بتقول ايه ؟

نظيرة :



-شفتي العروسة كانت وحشة ازاي

سميحة -

يا شيخة حرام عليكي دي كانت امورة

نظيرة :

امورة ايه داخل عليكي حبة الاحمر والاخضر اللي فرشة وشها بيهم

سميحة :

-طيب بس كانت حلوة ربنا يهنيها


نظيرة :

فعلا المثل بيقول زوق البوصة تبقي عروسة

سعاد :

يووووه ولا ام العروسة يا اختي كانت نازلة عياط طول الفرح

نظيرة

بتعيط من الفرحة يا اختي مشفتيش كانت لامة فلوس اد ايه

سميحة :

اعوذ بالله يا جماعة حرام عليكم بلاش نجيب في سيرة حد

نظيرة
ايوة علي رايك يا اختي حاكم هي غايبة بس ملايكتها معانا

سميحة

ههههه سبحان الله مستقربي وتقولي علي اكتافنا ملايكة بتكتب وتتقي الله "

سعاد :"

صح بلاش نجيب في سيرة حد بس شفتي خالها كان نازل علي البوفية ولا اللي عمري كل قبل كدا

سميحة :

"مفيش فايدة رجعوا للنم تاني "

نظيرة :

ولا يا اخواتي البت العروسة شوفتوها مسبتش ودن العريس يا سلام كانت بتقوله ايه السئيلة دي

ولا العريس هو كمان نازل رغي في ودنها وكركر كل دقيقة والتانية بيقولوا نكت صحيح عالم فايقة

سميحة :

عرسان بقي وفرحانين ربنا يهنيهم ادعولهم بدل التقطيع في شعورهم .

نظيرة :

شعور ايه خال عليكي البروكة اللي حاطاه اللي متتسمي العروسة


سميحة :"

هههههههه انا بس نفسي اعرف انتي شايلة منها ليه بس

نظيرة :

وانا هشيل منها ليه يا اختي الحمد لله انها رفضت تتجوز ابن خالي اللي انا وديتهلها وكبستني معاه

سميحة :

ايوة قلتيلي علشان كدا بقي

نظيرة :

لالالالا اوعي تفكريني متغاظة منها دي ولا تعنيني

سميحة :

لالالا ما انا فاهماكي طبعا

بس الله يهيدنا جميعا يا جماعة بطلوا نميمة بقي

سعاد :

دي مش نميمة يا ستي احنا بس بندردش علي ما نوصل للبيت

طيب بالله عليكم دي نميمة ولا مش نميمة ؟

بنعملها كلنا ولا لاءة ؟ يا اما مؤيدين يا معارضين ؟

مينفعش مرة نخرج من فرح واحنا ساكتين طبعا نموت فيها صح ؟